Литвия делегацыясынын катышуусунда бизнес-форум

2023-жылдын 25-майында LEX юридикалык фирмасы Кыргыз Республикасынын Соода-өнөр жай палатасы Литванын Казакстандагы, Кыргызстандагы жана Тажикстандагы Элчилиги жана Литванын соода-өнөр жай жана кол өнөрчүлүк палаталарынын ассоциациясы менен бирге уюштурган литвалык жана кыргыз компанияларынын ортосунда өнөктөштөрдү табуу жана сооданы жөндөө максатында өткөн бизнес-форумга катышты.

Литва Республикасы тарабынан делегациянын башында Литва Республикасынын Казакстан Республикасындагы, Кыргыз Республикасындагы, Өзбекстан Республикасындагы жана Тажикстан Республикасындагы Элчиси Гинтаутас Васюлис жана Литванын соода-өнөр жай жана кол өнөрчүлүк палаталарынын ассоциациясынын Президенти Сигитас Гайлюнас болушту. Делегациянын курамына Литва Республикасынын ири бизнес өкүлдөрү да кирди. Бизнес-форумга Кыргыз Республикасы тарабынан Тышкы иштер министрлигинин, Соода-өнөр жай палатасынын, ошондой эле бизнес-коомчулуктун өкүлдөрү катышты.

Литва Республикасынын Казакстан Республикасындагы, Кыргыз Республикасындагы, Өзбекстан Республикасындагы жана Тажикстан Республикасындагы элчиси өз сөзүндө Литва менен Кыргызстандын ортосундагы соода жүгүртүү 2022-жылы 372 миллион еврого жеткендигин белгиледи. Бул жыйынтык, айрыкча, географиялык аралыкты жана акыркы жеткирүү чынжырынын көйгөйлөрүн эске алганда, абдан оң жыйынтык болуп саналат. Кызматташтыктын позитивдүү динамикасы товар жүгүртүүнүн мындан ары да өсүшүнө үмүттөнүүгө мүмкүндүк берет. Бизнес-форумдун жыйынтыктары боюнча Кыргыз Республикасынын Соода-өнөр жай палатасы менен Литванын Соода-өнөр жай палаталарынын ассоциациясынын ортосунда өз ара түшүнүшүү меморандумуна кол коюлду.

Иш-чаранын алдыңкы катышуучуларынын сөзүнөн жана логистикалык кызмат көрсөтүүлөр, IT-технологиялар, курулуш материалдарын өндүрүү, фармацевтика, үйлөрдү жана имараттарды куруу, айыл чарбасын тоют менен камсыз кылуу, металл конструкцияларын өндүрүү, жумушчуларды жалдоо боюнча кызматтарды көрсөтүү жана башка көптөгөн ушул сыяктуу багыттарды көрсөткөн литвалык 10 компаниянын ишмердүүлүгүн баяндаган видео презентациядан кийин Кыргызстандын бизнес коомчулугунун өкүлдөрү менен эки тараптуу жолугушуулар өткөрүлдү.