Маалымат порталындагы уруксат берүүчү документтерге арналган тегерек стол жөнүндө

2023-жылдын 27-июнунда LEX Юридикалык фирмасы Кыргыз Республикасынын Экономика жана коммерция министрлиги жана Эл аралык финансы корпорация (IFC) тарабынан иштелип чыккан «Уруксат берүүчү документтердин бирдиктүү электрондук базасынын» долбоорун талкуулоого арналган тегерек столдун катышуучусу болду. Бул иш-чара Бишкек шаарында жайгашкан Hyatt Regency мейманканасында болуп өттү.

Тегерек столго Кыргыз Республикасынын Экономика жана коммерция министринин орун басары Усенбекова Айнура Доктурбаевна, Кыргыз Республикасындагы IFC башкармалыгынын жетекчиси Манижа Мамаднабиева, JIA Бизнес Ассоциациясынын Аткаруучу директору Азамбек Жээмбай уулу, IFC долбоорунун консультанты Мирбек Окенов, бизнес-коомчулуктун өкүлдөрү, ошондой эле лицензияларды жана уруксаттарды берүү функциясын аткарган тиешелүү мамлекеттик органдардын кызматкерлери катышышты.

IFC долбоорунун консультанты Мирбек Окенов катышуучуларды Лицензиялардын жана уруксат бурүүчү документтердин порталы (www.elicense.gov.kg) менен тааныштырды. Бул портал иш процессинде жүзөгө ашыруу үчүн зарыл болгон бардык уруксат берүүчү документтер жана жол-жоболор, анын ичинде ар кандай белгиленген формада уруксат берүүчү документтерди берүү, мамлекеттик реестрлерге киргизүү, атайын укук берүү, ыйгарым укуктуу мамлекеттик органдар жана жергиликтүү өз алдынча башкаруу органдары тарабынан акы алуу жөнүндө маалыматтарды камтыйт. Азыркы учурда Кыргыз Республикасынын Экономика жана коммерция Министрлиги порталды мамлекеттик органдар жана жергиликтүү өз алдынча башкаруу органдары тарабынан уруксат берүүчү документтер жөнүндө маалыматтар менен толтуруу боюнча иштерди координациялоону жүзөгө ашырып жатат.

Талкуунун жүрүшүндө www.elicense.gov.kg Маалымат порталынын өзгөртүүнү жана жакшыртууну талап кылган негизги көйгөйлөр талкууланды. Тактап айтканда, бизнес өкүлдөрү порталдын туруктуулугун камсыз кылуу, онлайн берилген арыздарды кароодо коррупциялык тобокелдиктерди азайтуу, берилген лицензиялар жана уруксаттар үчүн төлөмдүн өлчөмү тууралуу маалыматтын жетишсиздиги, айрым ченемдик укуктук актылардын эскирген варианттары, ошондой эле көпчүлүк мамлекеттик органдар тарабынан порталдын толук толтурулбагандыгы боюнча суроолорду берип, сунуштарын айтышты.

IFC долбоорунун консультанты Мирбек Окенов суроолорго жооп берип, порталдын ишине өзгөртүүлөрдү жана толуктоолорду киргизүү боюнча бизнес-коомчулуктун сунуштары жана сын-пикирлери бул интернет-ресурсту мындан ары өркүндөтүүдө чагылдырыла тургандыгын белгиледи.

LEX Юридикалык фирмасы Кыргыз Республикасынын Экономика жана коммерция министрлигине иш-чарага катышуу мүмкүнчүлүгү берилгени үчүн терең ыраазычылыгын билдирет, анткени LEX Юридикалык фирмасы мамлекетте бизнес чөйрөсүнүн иштешин жакшыртууга мүмкүн болгон укуктук реформаларга ар дайым өз кызыкчылыгын көрсөтүп келет.